Har beeta lamha jahan me ek yaad chod jaata hai agar vo kisi k intjaar mein bitaya gaya ho..

Shayad aap sabhi iss baat se sahmat honge ki intjaar chahe jis roop,awaran aur paristithiyon mein kiya jaye kathin hota hai..ashcharya nahi agar aapke vicharon mein ek sundari  ki tasveer apne premi ka intajaar karte hue baar baar ghadi dekh rahi hai aur aap meri baat ka virodh karne ka mann bana chuke hon.
Aap is baat par apni  mat bhinnata yah kahkar pradarshit karne walen honge k jeeven mein preyasi ki prateeksha se madhur shyan aur koi nahi.

parantu jara thahariye,main yahan premi-premika k 'prateeksha-milan' ka lalit chitran nahi karne walin hoon varan baat doctor sahab k dawakhane mein apni rugnawastha ka ilaaz karwane hetu kiye jane wale intjaar ki ho rahi hai..
Pichle dino,jab aas paas sabhi log viral bukhaar ki chapet mein aakar dharashayi hone lage to maine ek tatpar teemardar ka 'role'  apnate hue poornaseva bhaav se "haal chaal pucho" muhim main bhaag lena shuru kiya.Par  issase pahle ki main "pichle 3 saal se doctor ka clinic nahi dekha" ke gauravshaali bakhaan jaari rakh paati,krura virason ne mujhe bhi apni chapet mein le liya.
Bade khed k saath likhana padh raha hai ki parinaam swaroop  "kal teemardaar,aaj beemaar" ki pankti mein ek aur naam shamil ho gaya.Khaansi ne apne purane sabhi record tod diye aur gale se aawaaj aisi nikal rahi thi jaise koi deewar par regmaal ghis raha ho.Bukhaar,bechaini aur anidra ka prabhav chehre par saaf dikhayi de raha tha.is beech attend ki gayi kakshayon mein khaansi ka jo anvarat prasaran kiya uss karan kai netron mein dayabhaav ka 
Jab college k aas paas k davakhano ki dawa prabhaavshali na sidhdh ho paayi to maine poorn mukti hetu grah nagar jane ka nishchaya kiya.
To ye to thi vo kahani jis karan aaj  main "dawakhane mein intjaar" ka apna taaja anubhav aap sabhi se baat rahin hun.Halanki,maine bharsak koshish ki k doctor ke paas jane se bach sakun kyunki ek to beemaari swataha hi aakhiri charan mein thi aur doosre doctor k clinic jana mujhe bahut bada "time waste" jaan padh raha tha ,samay ka sadupayog grahnagar ki galiyon me vichran karte hue humumar tarun-tarunaayiyon ke "latest fashion" ka awlokan kar kiya ja sakta tha.Mann me gahre kahin doctor dwara parhej ki ek lambi list ka ek darr bhi tha jo mere ice cream,lassi ,gol gappe,chaat adi adi ka swaad lene k sapno par nangi talwaar ki bhaanti latak raha tha.
Parantu meri tamaam daleelen,tamaam daawe matashri k "ilaaj jad se hona chahiye" ke bhramastra ke saamne wifal ho gaye aur haar kar mujhe dawakhane jana hi padha."Kis doctor ko dikhayen" is duvidha ka ant mummyji
ne 'wahi apne purane physician' k naam par  kiya.
kaafi samay baad jane par clinic kuch badala badala sa najar aaya,mummyji se gyat hua ki pichle warsh hi 'renovation' ka kaarya purna hua hai.Main dekh rahi thi ke marble ki jagah nayi tilelen chamchama rahi thi,aangan jyada bada ho gaya tha,nayi bench,naye parde aur naye gamlon ka naya arrangement mann ko bha gaya.
kul milakar ye naya awataar netrasukh k saath saath urjawaan bhi jaan padha aur ek behtareen shaam ko clinic mein bitane ka dukh thoda kam hua.Bass kuchch nahi badala tha to vo the hamare receptionist mahodaya aur unka mota chashma.Parchi banwane ki aupchariktaon ke baad apna no. lagwakar jo ki kaafi parchiyon k baad aana tha,hum bench par aakar baithe aur phir shuru hua "apni baari aane ka ek lamba intjaar"..
par ye intjaar kai maayano me alag tha.
Baat aisi hai ki isi pvt clinic complex mein bagal mein ek baal chikitsak ka clinic bhi hai,to jaisa ki apekshit hai aas paas kai chote chote nanhe kadam chalkadmi kar rahe the.Kuch bhole se chehre maan ki god me gahri neend mein khoye the,to kuch jis jugat mein the ki mummy ji kuch rupaiye den to vo agle mod par stith dukaan se kuch chijji le saken.Mere saamne wali bench par ek pyaara sa bachcha kareeb 3 saal ka apni ma k bagal main baitha hua tha aur uski badi badi kaali aankhen ,jo use apni maa se prapt huin thin,har cheej ko badi hairaani se dekh rahin thin.Uska aplak ek or dekhna phir akaaran muskura dena mujhe ek nayi urja,nayi prerna se bhar raha tha.Main apne aapko rok na saki,ek muskaan uski or uchaali to usne bhi jo nanhe se honthon se jo muskaan bikheri bass !!is par uski maa na "didi ho hello karo" k saath hamara rishta bhi kayam kar diya.
Mann iss baat par bhi prassanna tha k bhagwaan ki kripa se aaj clinic kisi  bhi balak balika ke rugna kradan se mukt tha,warna bachche muskurate hue hi acche hi lagte hain...ek baar rona shuru kiya nahi k aap bhaagte najar aayenge!!
dusri or ek bacha ,kuch hi mahino ka,apni maa ki god me leta tha,soya jaan padta tha..par uske pita ki vyakulta bata rahi thi ki stithi saral nahi hai..unki baaton se ye nishkarsh nikala ki bachche ko tej bukhaar hai,kai dino se ..saans lene mein bhi taqleef aur tamaam jude hui jatiltayen..Pita mahodaya ki adheerta ki to koi seema nahi thi,ghadi ghadi bachche k sar ki patti badal rahe the..tabhi pathologist ne muskurate hue apna haath unke kandhe par rakha kaha itni chinta ki baat nahi hai..dawai se bukhaar toot jayega..sab theek hai..

isi sab ke beech wahan t.v. par ,jo upar reception counter k saamne wali slip par rakha hua tha,sunny deol kikoi film aa rahi thi.nahi nahi..yahan doordarshan hi hai..namak majboori nahi thi waran receptionist mahoday sunny k bade fan jaan padte the..maine bhi ek najar ghumakar dekha to film apne antim padaav par thi aur sunny mahoday apne shareer shauthav ka pradarshan karte hue villain mahoday ko berahami se peet rahe,gunda mahoday aone kuch daaw dikhakar,kuch kood phaand,banawati lagti dishum dishum k baad..sunny ke chaaku ka shikar ho gaye..aashcharya,mamuli sa khoon baha aur thoda hilne dulne k baad gunde ka sharir shaant ho gaya..are isse jyada khoon to ek ghutna chilne me aaye..baharhaal agle seen mein sunny police ki wardi main tiranga lahrate najar aate hain..aur ye torture khatam hota hai..main iss aas main thi k shayad
b4u music pe remote stithr ho aur main nayi release filmo k sandharbh me apne gyan ka vistaar kar sakun..par nahi..receptionist mahodaya shayad apne purane dino ko yaad kar rahe the..stargold par aati ek anya boring film par ruk kar hi unhone apna remote neeche rakha...aur maine star cast ka neereekshan karne ki jahmat bhi nahi uthaayi..
tabhi ek muslin mahila clinic mein daakhil hui,burkhe me dhaki hui,shayad saath mein unke swasur ji the..phycician ko dikhana tha ..burkha,mere andar ka saamajik keedha vichaarotejit ho gaya,mann burkhe ke wajud par prashna par prashna karne laga.Par purush ki nigaahon se bachane ka saadhan ya naari ki mahatwakashayon par ankush,sahara ya bandhan..sabse jyada pareshan to ye baat karne lagi ki "itni garmi me kala kapda vo bhi sar se paawn tak.." issle pahle ki main in vicharo ki paheli main aur khoti aur apne shashair ka taapmaan vyarth hi badhati..bagal se jaati sadak mein jaate ek bikesawaar ne mera dhyaan kheench liya (???)..issile nahi ki vo smartness mein akshay kumar ya john abhraham ko maat deta tha parantu isliye ki bike sawaar ek nawyauwana thi..ek thandi aah k saath apni bheeruta par laaj aayi ke apni gaadi to kabhi 'ladybird 'se aage nahi badhi...
iss intajar ki ghadiyon mein kayi choti badi kahaniyan aur hain..par chaliye aapko aur bore na karte hue aakhiri padaaw par le chalte hain..
to mera no. akhirkar aa hi gaya..usse pahle mera'temperature' liya gaya ashanurup bukhaar nahi tha..
Doctor sahab k kamre mein dakhil hue to unhone chirparishit stool par baithne ka ishara kiya.
mujhe yaad hai bachpan me us stool par poore 180 degre gol ghomte hue bada maja aata tha...main is baar bhi us anand ko phir se jeena chahti thi par umra k saath kuch moh na chahkar bhi chodne padte hain.
aur doctor sahab army sewa se nivrit hain..aur vishesh aur anokhi baat ye k har mareej ka ek record banta hai,jab unki table mein apna record dekha to chote se chote harphon mein aajtak ki saari meetingo k 'prescription like hue the..aur tareekhen 1995 se shuru ho 2004 tak aa rahin thin..ek ajeeb sa ahsaas hua jise main shabdo me bayaan nahi kar paa rahi hun...

kya taqleef hai??
sir,viral fever aur khaansi thi..khaansi to ab kaafi theek hai....
mere dimag mein shayad parhej wali baat thi aur main apni beemari ko chote se chota kar swashthya ka jaama pahna hi rahi thi ki mummy bol padi.."iski khaansi das din baad bhi poori theek nahi hui hai,subah munh sooja rahta hai,aankhen....
manna padega mummy ki "observation power" ko mujhe laga main janmon ki beemar hun..Ma ki mamta...
"muhn kholo,jheebh andar..."
"saans lo"..doctor ka aala apko akarshit nahi karta??
pet mein koi taqleef.."
"nahi sir"

Phir mummy ki taraf rukh karte hue we kumaoni mein shuru ho gaye...hamesha ki tarah,apni boli ki mithaas kaano mein shahad gholne lagi..
"yas ne,yau khoonek jaanch kara liya..
gaw mein soojan le chu,aji infection na jaro.."
"yau goi khanu baad char din tak diya..aur yau roj raat aath baaji.."
"Thand garamak parhej kariya..thand matlad frijok paani,icecream,kulfi aur garam ..tej mirch mashyala,khatayi....."
satyanaash..lo ji jiska darr tha wahi hua..
meri icecream ...meri chaat..nahi..
dawaiyan kharedne k baad jaisi hi ghar k paas wale chaurahe pe pahunche to softy ka thela dekh munh pe paani aa gaya,college ki thandi wadiyon me to icecream itna nahi lalchati jitna k ghrah nagar ki garmi...

mann masos kar ghar pahunche,chalo ghar aane ka dheya poora hua...

mitron ..agli teeno shaam ko maine icecream gol gappon k poore maje liye,maa bhi kya kahti,sunta kaun hai..
tabiyat..wo to theek hi thi..main kahan beemaar padhti hun!!!